Que desexamos os homes gays cando abrimos unha app de sexo e falamos de «destruirnos», «usarnos» ou «enchernos»? De onde xorde esa linguaxe da transgresión
Lonxe de respostas simplistas ou de fácil recurso psicolóxico, este traballo explora como estas expresións e prácticas foron interpretadas como síntomas culturais dunha falta, como fetiches socialmente construídos ou como efectos de tensións entre desexo, norma e poder.
Desde O Banquete de Platón ata os actuais chill, pasando polo mito de San Sebastián ou os cuartos escuros, as prácticas de sexo a pelo durante a crise do sida, o matrimonio homosexual, o cruising e as redes dixitais, este traballo examina os cambios históricos, psicosociais e tecnolóxicos que acompañaron a creación e desenvolvemento dos desexos e fantasías homoeróticas. A través de distintas prácticas sexuais veremos como se marcaron as súas limitacións e desviacións sobre a norma social, pero tamén a súa potencia creativa para poñer en cuestión toda fantasía de identidade.
