Que é “lo queer”? Cales son as súas orixes e ferramentas teóricas? Cales son as súas discrepancias cun sector do feminismo que o considera un cabalo de Troia dentro do movemento? Nun momento no que estes debates parecían estar superados, a reacción do chamado sector trans-excluínte e da ultradereita trouxéronos de volta, alimentando non poucos malentendidos. “Lo queer” non é un produto neoliberal nin as persoas queer elixen o seu sexo/xénero/identidade así, sen máis. As teorías queer achegan moitas claves para entender de forma máis fluída cuestións relativas aos xéneros, as sexualidades, identidades e corporalidades, máis alá dos binarismos. Ademais, teñen en conta como se entrecruzan o xénero, a clase, a sexualidade, a idade, a capacidade, a raza, a etnia, o estatus migratorio... cuestións clave para cuestionar os propios privilexios de brancura, clase ou cidadanía, entre outros. Gracia Trujillo reivindica tamén que as pedagogías queer cheguen ao ámbito educativo, que se coñezan e valoren os percorridos activistas, as coalicións entre a loita feminista e a dos colectivos LGTBI+ e queer. Recuperar estes pactos, centrarse máis en obxectivos comúns e menos en identidades, adquire agora especial relevancia.