O pensamento heterosexual de Monique Wittig, activista lesbiana e feminista, é unha obra referente da teoría queer que revolucionou o campo dos estudos feministas desde a súa publicación.

A través de nove ensaios, Monique Wittig propón enfocar desde unha perspectiva de xénero todas aquelas cuestións fundamentais para a construción da ideoloxía do mundo moderno: a orde social, a loita de clases, as estruturas de poder ou a linguaxe. A autora quere diferenciar o concepto de «a muller» como mito imposto pola opresión e «as mulleres» como clase produto das relacións sociais.

Wittig rexeita a heterosexualidade como unha orientación ou práctica sexual e preséntaa como un réxime político fundamentado na sumisión e apropiación das mulleres. A autora defende que a muller é unha persoa social, política e ideolóxica que pode escapar da heteronormatividade e presenta a figura da lesbiana como escrava prófuga do sistema heterosexual exclusivo, xa que non necesita o outro termo da oposición binaria.

O pensamento heterosexual é unha obra clásica do pensamento feminista: precursora da teoría queer, hoxe en día segue sendo indispensable para profundar nos estudos de xénero.