Cuberta traseira: «Non estou aquí para contar a guerra de Troia. Esta é a historia da miña carne, alí onde coincidiron a morte e o amor». Con estas palabras de Patroclo, compañeiro de armas de Aquiles, comeza o monólogo de En mitad de tanto fuego, o canto dun personaxe mitolóxico que foi, ante todo, carne namorada e desexo. Tomando como punto de partida o canto XVI da Ilíada, o dramaturgo Alberto Conejero bríndanos unha achega persoal e íntima ao poema de Homero, unha nova mirada vivida e contada desde un personaxe secundario no relato habitual, tan discutido como fascinante e misterioso: Patroclo, o «máis amado» por Aquiles. En mitad de tanto fuego —que enlaza diversas épocas e onde aparecen referencias e citas de, entre outros, Safo, Pedro Lemebel, Anne Carson ou Luis Cernuda— é un intento de contar a historia doutra maneira, un alegato antibelicista e unha mostra máis da impotencia da arte ante a guerra; un oratorio polas vítimas que fala de conceptos como o poder, a paixón, a violencia ou a patria. Alberto Conejero, gañador do Premio Nacional de Literatura Dramática en 2019 e un dos autores de teatro españois máis recoñecidos, comparte así a beleza, o misterio e a escuridade dun poema épico e achéganos a unha obra fundamental da literatura clásica grega.