Fucked Feminist Fans refírese ao momento no que te atopas por primeira vez cos feminismos, decátaste de que es feminista e abres os ollos ao cabreo que tes. Tamén podería ser a etiqueta que algún crítico cultural usaría para falar, entre outras, das grupis dos sesenta e setenta; das Riot Grrrls e das «Angry Young Women» dos noventa; das Spice Girls e do resto de representantes do Girl Power; de Madonna, Britney Spears, Christina Aguilera, Lady Gaga ou Beyoncé —e das súas actuacións nos MTV Video Music Awards—; das Pussy Riot, ou de Courtney Love, que en 2005 xa advertira das agresións sexuais de Harvey Weinstein na industria do cine. En Fucked Feminist Fans. Os orixes do #MeToo desde a cultura pop musical, Leyre Marinas afonda nas conexións que mantiveron durante os últimos trinta anos a música, os movementos feministas e o sexismo difundido polos medios de comunicación. Un diálogo no que xogan un papel fundamental a terceira e a cuarta onda feministas e a explosión do #MeToo en 2017 e as súas derivadas internacionais, verdadeiro punto de non retorno no que á concienciación pública do acoso e os abusos se refire. Quen lea este libro sentírase fucked algunha vez e tamén se considerará feminista e terá sido ou é fan dalgunhas das persoas que aparecen nas súas páxinas.