Os homes comezaron a morrer. Hai décadas, un evento súbito desencadeou unha catástrofe demográfica na que pereceu a metade da poboación mundial: desapareceron todas as persoas con cromosoma Y. Como consecuencia diso, as superviventes e os seus descendentes herdaron a Terra e transformárona. Moi lonxe e esquecidos quedaron os efectos medioambientais do anterior sistema económico, así como as inxustizas e as desigualdades que caracterizaban o Vello Mundo. Pero a utopía veráse abruptamente interrompida. Acaso as criaturas extintas poden reaparecer de xeito espontáneo e sen unha explicación racional? E, sobre todo, como reaccionarán as mulleres ante un sobresalto que podería derrubar todas as certezas ata ese momento incontestables? Inken, unha das máis prestixiosas xenetistas mundiais, e a súa compañeira Seiya terán que enfrontarse a estas incógnitas tras a aparición do primeiro home con cromosoma Y despois dun século desde a súa extinción. Trátase da primeira novela de ciencia ficción de Carolina Martínez. Surgiu do desenvolvemento dun relato especulativo que foi finalista do Concurso Homocrisis de 2019, e este dunha tarde entre cafés e cábalas literarias sobre outra realidade posible, ademais, plausible.