Tras abandonar a súa carreira de avogada para dedicarse á escritura, a protagonista e narradora desta novela anuncia ao seu exmarido que comezou a saír con mulleres. A represalia deste non se fai esperar: cheo de odio e empeñado en afastala do seu fillo, decide levar o asunto aos tribunais para quitarlla a custodia, e manipula ao neno para que manifeste que non quere seguir vendo á súa nai. Empeza entón un longo e devastador proceso xudicial, durante o cal a muller, esmagada pola absurdidade burocrática e desprotexida fronte á hipocrisía da lei, trata de organizar a súa nova vida arredor da ausencia. Sen diñeiro nin pertenzas, vai saltando entre habitacións prestadas, estudos minúsculos e reservas de hotel, consagrada a unha rutina monástica que consiste en nadar a diario, ler e escribir. E mentres se suceden as audiencias, os exames psicolóxicos e moitos meses de espera, explora a súa redescuberta orientación sexual a través de breves aventuras con numerosas mulleres de diferentes idades, corpos, linguaxes e estilos de vida. A medio camiño entre a literatura punk e a confesión ascética, esta novela valente e desgarradora fala do amor nas súas múltiples formas. Cunha prosa crúa, minimalista e visceral, Constance Debré aborda sen complexos temas como o sexo, a liberdade e o autodescubrimento, e presenta un relato dolorosamente fermoso sobre os sacrificios imposibles que se lles esixen ás nais.